நஞ்சு ஆனால் நஞ்சல்ல!!!

இன்று தொலைக்காட்சி சேனல்களை பார்த்தால் அதில் வரும் பெரும்பாலான விளம்பரங்கள் பல்வேறுபட்ட தொற்று நீக்கிகள், கிருமி நீக்கிகள், கைகழுவும் திரவங்கள் (hand sanitizer), சவர்க்காரங்கள் சம்பந்தமானவையே. இவை பல்வேறுபட்ட வர்த்தக நாமங்களில் பல விலை வித்தியாசங்களில் கிடைக்கின்றன. இவற்றின் மூலம் இவற்றினை உற்பத்தி செய்யும் கம்பெனிகள் பெரும் தொகையினை இலாபம் ஈட்டுகின்றன என்பது வெள்ளிடை மலை. அண்மையில் சந்தைக்கு வந்த கைகளை சுத்தப்படுத்தும் ஒருவகையான கைகழுவும் திரவத்தில் 90 வீத செறிவு கொண்ட மதுசாரம் (alcohol) உள்ளதால் அதனைப்பாவிப்பது உடல் நலத்திற்கு பெரும் கேடு விளைவிக்கும் என்ற வகையில் சில செய்திகள் வெளிவந்தன. இங்கு முக்கிய விடயம் என்னவென்றால் அங்கு விளம்பரப்படுத்தப் படுத்தப்பட்ட கைகழுவும் திரவத்தினை பயன்படுத்தி கைகளை சுத்தப்படுதினால் கைகளை கழுவ வேண்டிய தேவை இல்லை. குறிப்பாக இந்த கைகழுவும் திரவம் ஆனது பாடசாலை மாணவர்களை இலக்கு வைத்து உற்பத்தி செய்யப்படுகின்றது.

இனி விடயத்திற்கு வருவோம். 90 வீத செறிவு கொண்ட மதுசாரத்தினை உள்ளடக்கிய இந்த கைகழுவும் திரவத்தினை பாவிக்கும் பொழுது நாம் நஞ்சாதலுக்கு உட்படுகின்றோமா? என்பதே இப்பொழுதுள்ள கேள்வி.

நாம் உள்ளேடுக்கும் மருந்து அல்லது நஞ்சானது எமது உடலில் குறித்த அளவினை விட அதிகமாக இருக்கும் பொழுதே அதாவது இரத்தத்தில் அதன் செறிவு குறித்த அளவினை தாண்டும் பொழுதே நாம் நஞ்சாதலுக்கு உள்ளவோம். மேலும் ஒரு மனிதனை கொல்ல தேவையான நஞ்சின் அல்லது மருந்தின் அளவு Lethal Dose (LD) என்று அழைக்கப்படும். இது மருந்து அல்லது நஞ்சிற்கு ஏற்றவாறு வேறுபடும். இந்த அளவானது மருந்து அல்லது நஞ்சினை உள்ளெடுக்கும் மனிதனின் உடல் நிறை, வேறு நோய்கள் உள்ள நிலமை , குறிப்பாக சிறுநீரக மற்றும் ஈரல் போன்றவற்றின் தொழில் பாடுகள் பாதிக்கபட்டுள்ளமை போன்றவற்றில் தங்கி உள்ளது.

02

நாம் 90 வீத செறிவு கொண்ட மதுசாரம் கொண்ட ஒரு போத்தலை (750ml) ஒரே தடவையில் மடமட வெனக்குடித்தால் நிச்சயம் வளர்ந்த மனிதன் ஒருவனுக்கு நஞ்சாதல் (intoxication) ஏற்படும்.

இங்கு பயன்படுத்தப்படும் கைகளை சுத்தமாக்கும் திரவத்தில் 90 வீத செறிவு கொண்ட மதுசாரம் இருந்தாலும் ஒருசில தடவைகள் பயன்படுத்தும் பொழுது அது மிக குறைந்த அளவிலேயே உடலை அடையும் . அந்த மிகச்சிறிய அளவினால் மனித உடலில் அதாவது சிறுவர்களின் உடலில் எந்தவிதமான தீங்குகளை ஏற்படுத்த முடியாது. அவ்வாறே பாதகமான பக்க விளைவுகளையும் ஏற்படுத்த அதன் அளவு dose போதாது. இதேவேளை சிறுவர்கள் அந்த கைகள் கழுவும் திரவம் அடங்கிய போத்தலின் உள்ளடக்கம் முழுவதினையும் ஒரேதடவையில் குடித்தால் நிச்சயம் இறப்பு ஏற்படா விடினும் ஒரு சில பாதக விளைவுகள் ஏற்படும். இவ்வாறே இதில் இருக்கும் மற்றைய இரசாயன பாதார்த்தங்களும் சிறிய அளவில் இருப்பதால் மனிதருக்கு தீங்கில்லை.

90 வீத செறிவு கொண்ட மதுசாரம் ஆனது ஓர் சிறந்த தொற்று நீக்கி ஆகும். இதன் காரணமாக இது சாதாரணமாக வைத்திய துறையில் பெருமளவில் பாவிக்கப்படுகிறது. முக்கியமாக அதிதீவிர சிகிச்சை பிரிவுகள், சில நோயாளர் விடுதிகள் போன்றவற்றில் வைத்தியர் அல்லது ஏனைய ஊழியர்கள் ஒரு நோயாளியினைப் பரிசோதித்த பின்னர் மற்றைய நோயாளியை பரிசோதிக்க முன்னர் இவ்வாறான 90 வீத செறிவு கொண்ட மதுசாரம் உள்ளடங்கிய திரவங்களை பயன்படுத்தி தமது கைகளை மூலம் சுத்தப் படுத்துவார்கள்.

இவ்வாறே நாம் பனடோலுக்கு பதிலாக பயன்படுத்தும் பனடீன் என்ற மாத்திரையில் codeine என்ற போதைப்பொருள் மிக சிறிய அளவில் காணப்படுகின்றது. இவற்றினை பாவிக்கும் பொழுது போதை ஏறுதல் மற்றும் போதைக்கு அடிமையாகும் தன்மை என்பன ஏற்படாது.

11 பேரினை பலிகொண்ட …..

முக்கிய புள்ளி சிக்கியது எவ்வாறு?

ஒரு  வாகன விபத்து நடைபெறும் பொழுது அதில் சாரதி மற்றும் முன்னிருக்கையில் இருந்தவர் யார் என்பதினை சரியாக கண்டறியவேண்டும். பொதுவாக விபத்தின் பின்னர் ஆள் மாறாட்டம் இடம் பெறும். இருவரும் விபத்தில் உயிர் தப்பினாலோ, ஒருவர் அல்லது இருவரும் இறந்தாலோ அவர்களின் விபத்துக்கு முன்னரான வாகன இருக்கையின் நிலை கண்டறியவேண்டும். சட்ட மருத்துவ பரிசோதனையில் அல்லது பிரேத பரிசோதனையில்  அவர்களின் வாகன இருக்கை நிலை எவ்வாறு  கண்டறியபடுகின்றது என்பதினை இப்பதிவு விளக்குகின்றது.

இங்கு முக்கியமாக அவர்களில் ஏற்படும் காயத்தின் இயல்புகளை வைத்தே அவர்களின் விபத்துக்கு முன்னரான வாகன இருக்கையின் நிலை கண்டறியப்படுகின்றது. அநேகமான வீதி விபத்துக்கள் வாகனத்தின் முன்பகுதி இன்னோர் வாகனத்துடன் அல்லது வேறு ஒரு பொருளுடன் மோதுவதினால் ஏற்படுகின்றது. இவ்வாறு மோதும் பொழுது வாகன சாரதி உட்பட வாகனத்தில் பிரயாணம் செய்பவர்கள் முன்னோக்கி வீசப்படுவார்கள். அதே சமயம் வாகனத்தின் பிரேக், ஸ்டியரிங் வீல் போன்றன உள்நோக்கி வரும் இதன்காரணமாக பின்வரும் வகையில் காயங்கள் ஏற்படும்

  1. சாரதியில் ஏற்படும் காயங்கள்

விபத்து ஏற்படும் பொழுது சாரதி முன்னோக்கி வீசப்படுவார் மேலும் ஸ்டியரிங் வீல் உள்நோக்கி வரும் இதன்காரணமாக ஸ்டியரிங் வீல் சாரதியின் நெஞ்சு பகுதியில் தாக்கி கண்டல் காயம், எலும்பு முறிவு, உரஞ்சல் காயம் போன்றவற்றினை ஏற்படுத்தும். இங்கு ஏற்படும் காயமானது சிலவேளை ஸ்டியரிங் வீல் இணை உருவமைப்பில் ஒத்து இருக்கலாம். விசை அதிகமாக இருக்கும் பொழுது நெஞ்சில் உள்ள நுரையீரல் இருதயம் போன்றவற்றிற்கும் வயிற்றின் மேற்பகுதியில் அமைந்துள்ள ஈரல், மண்ணீரல் மற்றும் இரைப்பை போன்றவற்றிற்கும் பாரிய காயங்கள் ஏற்படலாம். இவ்வாறு தூக்கி வீச முற்படும் பொழுது சீற் பெல்ற் ஆனது சாரதியில் குறிப்பிடத்தக்க வகையில் உரஞ்சல் காயத்தினை ஏற்படுத்தும். மேலும் நெற்றி மற்றும் தலைப்பகுதி ஆனது டாஸ் போட்டில் பலமாக அடிப்பதன் காரணமாக மேற்குறித்த பகுதிகளில் பிளவு காயங்கள், எலும்பு முறிவு போன்றன ஏற்படும். பிரேக் மற்றும் கிளச் போன்றன பலமாக உள்நோக்கி வரும் பொழுது காலின் அடிப்பகுதியில் இருந்து இடுப்பை நோக்கி விசை தாக்கும் அதன் காரணமாக மேற்குறித்த பகுதிகளுக்கு இடையில் எங்காவது என்பு முறிவு, முழங்கால் மூட்டு விலகல், இடுப்பு மூட்டு விலகல் என்பன   ஏற்படலாம். மேலும் டாஸ் போட் உள்நோக்கி வருவதன் காரணமாக கால் அல்லது முழங்கால் பகுதியில் பிளவு காயங்கள் (laceration), எலும்பு முறிவு போன்றன ஏற்படலாம். இவ்வாறு சாரதியில் ஏற்படும் குறிப்பிடத்தக்க காயங்களின் இயல்புகளை வைத்து சட்ட வைத்திய அதிகாரி இலகுவாக சாரதியினை அடையாளம் காணுவார்.

(மேற்குறித்த படங்கள் சீற் பெல்ட்டினால் மற்றும் ஸ்டியரிங் வீல் போன்றவற்றினால் ஏற்பட்ட காயங்களை குறிக்கின்றது)

(மேற்குறித்த படங்கள் சாரதியிலும் முன்னிருக்கையில் பயணிப்பவருக்கும் எவ்வாறு காயங்கள் ஏற்படுகின்றன என்பதை விளக்குகின்றன).

சில சந்தர்ப்பங்களில் சாரதியின் பாதணியின் அடிப்பகுதியில் பிரேக்கினை பலமாக அழுத்தியதன் காரணமாக ஏற்படும் தவாளிப்பு அடையாளம் (imprint mark) காணப்படும்.

  1. முன்னிருக்கையில் பயணம் செய்பவருக்கு ஏற்படும் காயங்கள்

ஓர் வாகனத்தில்  முன்னிருக்கையில் பயணம் செய்யபவருக்கும் சாரதியில் ஏற்படும் காயங்கள் போலல்லாது காலின் அடிப்பகுதியில் இருந்து இடுப்பை நோக்கி விசை தாக்கும் காரணமாக மேற்குறித்த பகுதிகளுக்கு இடையில் எங்காவது என்பு முறிவு, முழங்கால் மூட்டு விலகல், இடுப்பு மூட்டு விலகல் என்பன   ஏற்படலாம். மேலும் டாஸ் போட் உள்நோக்கி வருவதன் காரணமாக கால் அல்லது முழங்கால் பகுதியில் அல்லது கால் பகுதியில்  பிளவு காயங்கள், எலும்பு முறிவு போன்றன ஏற்படலாம். இவ்வாறு வாகனத்தின் முன்னிருக்கையில் இருப்பவருக்கு  ஏற்படும் குறிப்பிடத்தக்க காயங்களின் இயல்புகளை வைத்து சட்ட வைத்திய அதிகாரி அவற்றினை  இலகுவாக  அடையாளம் காணுவார்.

 

மேலும் சாரதியிலும் முன்னிருக்கையில் இருப்பவருக்கும் சீற் பெல்ட் இனால் வரும் காயங்கள் எதிர்மாறான பக்கங்களில் இருக்கும். இறுதியாக விபத்துக்குள்ளான வாகனத்தினை சட்ட வைத்திய அதிகாரி பார்வை இடுவதன் மூலம் காயம் அடைந்தவர் அல்லது இறந்தவர் வாகனத்தில் விபத்து நடைபெற முன்னர் வாகனத்தின் எந்த ஆசனத்தில் இருந்தார் என்பதினை இலகுவாக கண்டுபிடிப்பார்.

 

 

சிறுமியை பதம் பார்த்த கிளிப்

இன்றைய உலகில் பெண்கள் பல்வேறுபட்ட அழகு சாதனப்பொருட்களை தமது அழகினை மெருகூட்டும் முகமாக பாவிக்கின்றனர். பல நிறுவனங்கள் பல்வேறு விதமான பொருட்களை இதன் காரணமாக உற்பத்தி செய்கின்றன. மேலும் பல்வேறுபட்ட போலி உற்பத்திகளும் சந்தையில் உலாவுகின்றன. இவற்றில் முக்கியமாக  பல்வேறு வகையான கொண்டைக்கு மாட்டும் கிளிப்புகள் (Hair clips) உள்ளடங்கின்றன.

அவள் ஏழு வயதான சிறுமி, தாயார் வேலை முடித்து வீடு வருவதினை கண்டதும் ஆசையோடு ஓடிச்சென்று தாயாரினை கட்டி அணைக்கின்றாள். தாயாரும் அவளினை தூக்கி அனைக்கின்றாள். சில வினாடிகள் தான் குழந்தை வீறிட்டு கத்துகின்றது. தாயார் பார்க்கும் பொழுது அவளது கொண்டையில் போடப்பட்டிருந்த கிளிப் ஆனது குழந்தையின் கழுத்து பகுதியில் முழுவதுமாக குத்தி உட்சென்று இருந்தது.

தாயாருக்கு கையும் ஓடவில்லை காலும் ஓடவில்லை, குழந்தையினை அசையாமல் வைத்திருந்தவாறு அவசர அம்புலன்ஸ் சேவையினை அழைத்து வைத்தியசாலைக்கு வந்தாள். அதிஸ்டவசமாக கழுத்தில் உள்ள பாரிய இரத்த குழாய்கள், களம், சுவாச குழாய் போன்றவற்றிற்கு எவ்விதமான காயமும் ஏற்படவில்லை. வைத்தியர்கள் சத்திர சிகிச்சை மூலம் உள்ளே இருந்த கிளிப்பினை அகற்றி எடுத்தனர்.

மேலே படத்தில் உள்ள கிளிப்பே இவ்வாறு ஆபத்தினை ஏற்படுத்தியது. அதன் நுனிப்பகுதியினை உற்று நோக்குவோமானால் அது கூர்மையானதாக உள்ளது. மேலும் அதன் விளிம்புகள் சொர சொரப்பாக (serrated) உள்ளது இதன் காரணமாக இவ்வகையான கிளிப்புகள் குறைந்த விசையுடன் மிக இலகுவாக எமது தோலினை ஊடுருவி சென்று ஆபத்தினை விளைவிக்கும். எனவே இவ்வாறான கிளிப்புகளுடன் சிறுவர்கள் விளையாடுவது ஆபத்தில் முடியும்.

எமது உடலில் எலும்புக்கு அடுத்து ஊடுருவ அதிக விசை தேவைப்படுவது தோல் ஆகும். இங்குள்ள கிளிப்பின் நுனிப்பகுதி தோலினை இலகுவாக ஊடுருவும் அதன் பின்னர் உள் அங்கங்களினை ஊடுருவுவதற்கு பாரிய விசை தேவைப்படாது என்பது குறிப்பிடத்தக்கது

தவறி வீழ்ந்தவனின் கதை

அவனுக்கு பதினேழு வயது. பாடசாலையில் உயர்தரத்தில் கல்விகற்கின்றான். குடும்ப வறுமைநிலை காரணமாக இரு வாரங்களுக்கு முன்னரே மேசன் உதவியாளராக கொழும்புக்கு  வேலைக்கு வந்திருந்தான். அன்று காலையில் 6வ வது மாடியில்  அவன் குறுக்கு சுவர்களுக்கான கொங்கிறீட் கற்களை சுமந்து வரும் பொழுதுதான் தவறுதலாக அத்தளத்தில் இருந்த துவாரத்தின் ஊடாக தரையில் வீழ்ந்தான். அவனது சக தொழிலாளர்கள் கீழ் தளத்தினை நோக்கி ஓடினர் ஒருசில வினாடிகள் தான் தண்ணீர் என்று கேட்டு முனகினான். அதன் பின்னர் அசைவொன்றும் இல்லை. மேலதிகாரிகள் அவ்விடத்திற்கு வந்தனர். அவர்கள்  தொழிலாளரினை நோக்கி சொன்னார்கள் “அவன் இறந்துவிட்டான் நீங்கள் உங்கள் வேலையினை தொடருங்கள்” என்று. அவர்களுக்கும் வேறு வழி இல்லை. சிறிது நேரத்தில் போலீசார் வந்தனர் அவனுடன் ஒரேதளத்தில் வேலை செய்தவர்களிடம் வாக்குமூலம் பெற்றனர். உடல் சிறிது நேரத்தில் அகற்றப்பட்டது.

பிரேத பரிசோதனையின் பின்னர் அவனது உடலை அவனது சொந்த ஊருக்கு கொண்டுசெல்ல அவனது குடும்பத்தினரிடம் காசு வசதி இல்லை. ஏன் அவனது தாய் மற்றும் தந்தை கொழும்பிற்கு வருவதற்கு பணம் கூட இல்லை. அவனது சக தொழிலார்கள் தங்களால் இயன்ற பணத்தினை சேகரித்து உடலை ஊருக்கு அனுப்பினர்.

இன்றைய கால கட்டத்தில் வடக்கு, கிழக்கு மாகாணங்களை சேர்ந்த பல இளைஞர்களும், மலையகத்தினை சேர்ந்த பலரும்  கொழும்பு போன்ற நகர்ப்புறங்களிலும் மத்திய கிழக்கு நாடுகளிலும் பல மாடி கட்டிட தொகுதிகளை நிர்மாணிக்கும் பணிகளில் ஈடுபடுகின்றனர். இவர்கள் பொதுவாக மேசன் வேலை, மின்சார வயர்களை மற்றும் நீர்க்குழாய்களை பொருத்தும் வேலை,  டைல் பதிக்கும் வேலை, பெயிண்ட் அடிக்கும் வேலை, அலுமினிய பிட்டிங் வேலை …. போன்ற பல்வேறு வேலைகளில் ஈடுபடுகின்றனர். பலர் சாதாரண கூலி வேலை செய்பவர்களாகவும் ஒருசிலர் மட்டும் தொழில்வாண்மை மிக்க வேலை செய்பவர்களாகவும் உள்ளனர். இவர்களில் பலர் குடும்ப வறுமை காரணமாகவே பாடசாலை படிப்பினை இடையில் விட்டுவிட்டு இவ்வாறான வேளைகளில் பகுதியாகவோ அல்லது முழுநேரமாகவோ ஈடுபடுகின்றனர்.

இவ்வாறு ஒரு தொடர் மாடி அமைக்கும் பொழுது நடைபெறும் பல்வேறு பட்ட வேலைகளும் உப ஒப்பந்ததாரர்கள்  மூலமே நடைபெறும். இவ்வாறே வேலைக்காரர்களும் பல்வேறுபட்ட தரகர்கள் மூலமே சேர்க்கப்படுகின்றனர்.

ஓர் தொடர் மாடித்தொகுதி கட்டிடம் கட்டப்படும் பொழுது லிப்ட் போன்றவற்றினை பொருத்துவதற்காகவும் பல்வேறுபட்ட தேவைகளுக்காகவும் ஒவ்வொரு தளத்திலும் தரைப்பகுதியில்  பல்வேறுபட்ட அளவுகளில் (floor openings) துவாரங்கள் இருக்கும். தொழிலார்கள் இத்துவாரங்களை ஒவ்வொரு தளங்களிலும் வேலைகளின் பொழுது உருவாகும் பல்வேறுபட்ட கழிவுகள் அடித்தளத்தினை நோக்கி போட பயன்படுத்துவார்கள் , மேலும் இரவு நேரங்களில் பல்வேறு தளங்களில் தங்கிநிற்கும்,  மது போதையில் இருக்கும் வேலைக்காரர்கள் வெறுமையான பியர் டின்கள், உணவு பொதிகள் போன்றவற்றினை இவற்றினுடாக வீசுவார்கள். பல சந்தர்ப்பங்களில் போதையில் மூத்திரம் கூட பெய்வார்கள்.

இனி விடயத்திற்கு வருவோம்,   இத்துவாரங்களினால் என்னதான் பிரச்சனை? பொதுவாக பல தொழிலார்கள் இவ்வாறு அமைக்கப்பட்ட துவாரங்கள் ஊடாகவே உயரமான கட்டிடங்களில் இருந்து வீழ்ந்து இறந்துள்ளார்கள். முக்கியமாக இத்துவாரங்களை சூழ தற்காலிக தடுப்புக்கள் வேலிகள் அமைக்க வேண்டும் ஆனால் நடைமுறையில் அவ்வாறு அமைக்கப்படுவதில்லை இதன் காரணமாகவே இவ்வாறன அகால மரணங்கள் நிகலுகின்றன. பல விபத்துகள் மதுபோதையில் நிகழுகின்றன. அநேகமாக புதிதாக வேலைக்கு வரும் உயரமான கட்டிடங்களில் வேலைசெய்து அனுபவம் அற்றவர்கள் இரவு வேளைகளில் நடமாடும் பொழுது தவறுதலாக  இந்த துவாரங்கள் ஊடாக தவறி விழுகின்றனர்.

(மேலே உள்ள இரு படங்களும் பாதுகாப்பு அற்ற துவாரத்தினையும், இளைஞன் தவறி விழுந்த இடத்தினையும் காட்டுகின்றன)

இது தவிர சில சந்தர்ப்பங்களில் கொங்கிறீட் தட்டுகள் உடைந்து விழுவதினாலும், தொழிலாளர் வேலை செய்யும் கம்பிகளாலான தட்டுகள் உடைந்து விழுவதினாலும் இறப்புகள் ஏற்படுகின்றன.

இவ்வாறு வேலைத்தளங்களில் வேலை செய்பவர்களுக்கு பொதுவாக காப்புறுதி செய்யப்படுவதில்லை. இதன் காரணமாக இறந்த பின்னரோ அல்லது காயப்பட்ட பின்னரோ காப்புறுதிப்பணம் கிடைப்பதில்லை.  தொழிலாளரும் இது பற்றி அலட்டி கொள்வதில்லை. மேலும் தொழிலாளருக்கு உயரமான கட்டிடங்களில் வேலை செய்யும் பொழுது எவ்வாறு விபத்துக்களை தவிர்ப்பது என்பது பற்றி பயிற்சி வழங்கப்படுவதில்லை அத்துடன் உரிய தற்பாதுகாப்பு சாதனங்களும் வழங்கப்படுவதில்லை. தொழிலாளருக்கு தமது உரிமைகள் மற்றும் தொழிலார் சட்டங்கள் போன்றவற்றில் போதிய அறிவு இல்லாதவரை இவ்வாறான சம்பவங்கள் தொடரும்.

சிறுமியும் ஸ்கூட்டியும்

அந்த சிறுமியின் தாய் பிரதேச செயலகம் ஒன்றில் முகாமைத்துவ உதவியாளராக கடமையாற்றுகின்றார். தகப்பனார் ஆசிரியர். அன்று காலையிலேயே தகப்பனாரும் மூத்த பிள்ளையான அண்ணனும் பாடசாலை சென்றுவிட்டனர். தாயார் சமையல் வேலை எல்லாவற்றையும் முடித்து விட்டு, அச்சிறுமியை அவளது அப்பம்மா வீட்டில் விடும் நோக்கில் ஸ்கூட்டியில் அழைத்து சென்ற பொழுதுதான் அந்த அனர்த்தம் நிகழ்ந்தது. தாயார் ஸ்கூட்டியினை செலுத்தும் பொழுது சிறுமி தாயாரின் கால்களுக்கு இடையில் ஸ்கூட்டியின் முன்புறத்தில் இருந்தவாறு பிரயாணித்தாள் . அவள் சிறிது வேகமாகத் தான் சென்றாள் ஏன்னெனில் அன்று ஒரு முக்கிய கூட்டம் காலையில் இருந்தது. அவர்கள் பிரதான வீதியில் நுழையும் பொழுது ஓர் வாகனம் அதிவேகமாக அவர்களை நோக்கி வந்ததது. தாயார் சடுதியாக பிரேக்கினை போட்டார். வாகனம் மோதவில்லை ஆனால் சிறுமியின் முகம் பலமாக ஸ்குட்டியின் ஹெட் (head) உடன் மோதி சில பற்கள் உடைந்து விழுந்தன கீழ் உதடு கிழிந்து தொங்கியது. மொத்தத்தில் சிறுமியின் முகம் ஒரு கோணலாகியது.

நான் அவளினை பார்வையிடும் பொழுது அவள் வேதனையில் துடித்துக்கொண்டிருந்தாள். சிறுமியின் ஏக்ஸ்ரே ஆனது அவளது கீழ் தாடை எலும்பு உடைந்து இருந்ததினை வெளிப்படுத்தியது. நல்ல வேலையாக தாயாருக்கு எவ்விதமான காயமும் இல்லை. தாயாரும் சிறுமியின் அருகே அழுதவாறு காணப்பட்டாள்.
இன்றைய காலப்பகுதியில் இலங்கையில் அதிகளவான மக்கள் ஸ்கூட்டி வகை மோட்டார் சைக்கிளினை பாவித்து வருகின்றனர். முக்கியமாக பெண்கள் இதனை விரும்பி பாவிக்கின்றனர் ஏன்னெனில் இலகுவாக ஓடமுடியும். மேலும் ஆண்களும் அதிகளவில் பாவிக்கின்றனர் ஏன்னெனில் இலகுவாக பொருட்களை கொண்டு செல்லலாம். அதாவது கால்கள் இடையேயும், இருக்கையின் கீழேயும் வைக்கலாம். அண்மைக்காலமாக சட்ட வைத்திய அதிகாரி என்ற வகையில் பல சிறுவர்களுக்கு இவ்வாறன வகை காயங்கள் ஏற்படுவதினையும், அவை அதிகரித்து செல்வதினையும் அவதானித்து உள்ளேன். இவ்வாறான காயங்கள் ஏன் ஏற்படுகின்றன என்பது பற்றி சிறிது நோக்குவோம்.

நாம் பலரும் சிறுவர்களை மோட்டர் சைக்கிளில் ஏற்றி செல்லும் பொழுது அவர்கள் நித்திரை கொண்டு வீழ்ந்து விடுவார்கள் என்றே பெரும்பாலும் சிந்திப்போம். ஆனால் இங்கு சிறுமிக்கு காயமானது சடுதியான அமர்முடுகல்  (deceleration force)காரணமாகவே ஏற்பட்டது என்பதை சிந்திக்க மறந்து விடுவோம். அதாவது இங்கு ஸ்கூட்டியின் வேகமானது ஒருசில செக்கன்களில் பூச்சிய நிலைக்கு வரும்பொழுது ஸ்கூட்டியின் கால்கள் வைக்கும் இடத்தில் நிக்கும் சிறுவர் முன்னோக்கி அதி விசையுடன் தள்ளப்படுவர் இதன்பொழுது அவர்களின் தலை ஸ்கூட்டியின் ஹெட் பகுதியுடன் பலமாக மோதும். இங்கு சிறுவர்கள் எனப்படும் பொழுது நான் 5 தொடக்கம் 6 வயதுக்கு உட்பட்டவர்களையே குறிப்பிடுகின்றேன் ஏன்னெனில் அவர்களின் உயரம் மிக குறைவானது அத்துடன் அவர்களின் தலைப்பகுதி மட்டுமட்டாக ஸ்கூட்டியின் ஹெட் உயரத்துடன் உடன் நிற்கும், சடுதியான அமர்முடுகளின் பொழுது தலையானது ஸ்கூட்டியின் ஹெட் உடன் மோதும். மேலும் சிறுவர்களின் கைகளில் போதிய பலம் இல்லாததன் காரணமாகவும் சிறுவர்கள் விபத்தினை எதிர்பாக்காததன்( not anticipate) காரணமாகவும் அவர்களின் தலை வேகமாக மோதும். இவ்வகையான விபத்துக்களினை எவ்வாறு குறைக்கலாம்? உண்மையில் சிறுவர்களை ஸ்கூட்டியின் முன்பகுதியில் நின்றவாறு வைத்துக்கொண்டு பிரயாணம் செல்வதினை குறைக்க வேண்டும் மற்றும் வேகத்தினையும் குறைக்க வேண்டும்.

Sketch001

மேலே உள்ள படம் எவ்வாறு அமர்முடுகல் விசையானது ஸ்கூட்டியின் கால் வைக்கும் இடத்தில் (foot rest) நின்றவாறு பிரயாணம் செய்யும் சிறுவர்களை தாக்கி காயத்தினை உண்டாடக்குகின்றது என்பதினை விளக்குகின்றது.

“இளம் கன்று பயம் அறியாது”

செத்தல் மிளகாயில் ஆபத்தா?

அண்மையில்  இந்தியாவில் இருந்து இறக்குமதி செய்யப்பட்ட செத்தல் மிளகாயில் aflatoxin என்ற புற்று நோயினை  உருகவாகும் toxin கண்டறியப்பட்டது. இவ்வாறு கண்டறியப்பட்ட செத்தல் மிளகாய்  தனியார் களஞ்சியங்களில் இருந்து பாரிய அளவில் அதாவது 20 மெட்ரிக் தொன் என்ற அளவில்  மக்களுக்கு விற்பனை செய்யப்பட்டுள்ளது. அதாவது உரிய தரச் சான்றிதழ் வரமுன்னரே இவ்வாறு விடுவிக்கப்பட்டு விற்பனைசெய்யப்பட்டுள்ளது .

இந்த செத்தல் மிளகாயில் என்ன பதார்த்தம் உள்ளது? அது ஏவ்வாறான விளைவுகளை மனித உடலில் ஏற்படுத்தும்? என்பது பற்றி பார்ப்போம். இவ்வாறு செத்தல் மிளகாயில் இருந்தது aflatoxin என்ற mycotoxin ஆகும். இது பங்கசு (பூஞ்சன) வகையான Aspergillus flavus, Aspergillus parasiticus , Aspergillus nomius போன்றவற்றில் இருந்து இயற்கையாக வெளியே சுரக்கப்படும் பதார்த்தம் ஆகும். இது மற்றைய பங்கசு  வகைகள் மற்றும் நுண்ணுயிரிகள் வளர்வதை தடுக்கும். இதில் aflatoxins, ochratoxins, citrinin, ergot alkaloids, patulin, Fusarium toxins போன்ற பல்வேறு வகைகள் உண்டு. Aflatoxin மட்டும் 18 வகையான உப வகைகள் உண்டு. இதில் aflatoxin b1 என்பதே மிகவும் ஆபத்தானது, இது class 1 என்ற carcinogen  (புற்று நோயினை உருவாக்கும் காரணி )  ஆக வகைப் படுத்தப்பட்டுள்ளது. அதாவது class 1 என்றால் இந்த பதார்த்தம் அடங்கிய உணவு பொருட்களை உட்கொண்டால் நிச்சயமாக புற்று நோய் உண்டாகும் சாத்தியம் உள்ளது. முக்கியமாக ஈரல் புற்று நோய் உருவாகும். இந்த aflatoxin ஆனது வெப்பத்தினால் அழிவடையாது அதன்காரணமாக சமைத்த பின்னரும் இரசாயன ரீதியில் உயிர்ப்பாக காணப்படும். மேலும் இவ்வாறு aflatoxin இனால் பழுதடைந்த உணவுகளை உட்கொண்ட பசுக்களின் பாலில் aflatoxin b1 இன் பக்க விளைபொருள் ஆகிய  aflatoxin m1 கண்டு பிடிக்கப்பட்டுள்ளது. இதில் இருந்து aflatoxin எவ்வளவு ஆபத்தானது என்பதை இலகுவாக விளங்கிக்கொள்ளலாம்.08

முக்கியமாக Aspergillus flavus என்ற பங்கசு தானியங்களான சோளம், கச்சான், அரிசி, மிளகு, செத்தல் மிளகாய் போன்றவற்றில் இயற்கையாக வளரும். முக்கியமாக மேற்குறித்த தானியங்களினை வெப்பமான ஈரலிப்பான இடங்களில் களஞ்சியப்படுத்தி வைத்திருக்கும் பொழுதும், மழை நாட்களில் அறுவடை செய்யும் பொழுதும்  இந்த பங்கசு தொற்றி கொள்ளும்.

தற்போதைய காலங்களில் பெரும்பாலான வீடுகளில் கறி மிளகாய்த் தூள் செய்வதில்லை மாறாக கடைகளில் இருந்தே வாங்குகிறோம் இவ்வாறு வாங்கும் சந்தர்ப்பங்களில் இவ்வகையான பங்கசு  தொற்றுக்கு உள்ளான செத்தல் மிளகாய்களும் நிச்சயம் அரைக்கபட்டு தூளின் ஊடாக எமது உணவில் சேரும்..

  1. இவ்வகையான தொற்றுதல் அடைந்த உணவுகளை உண்பதினால் என்ன சுகாதார சீர்கேடுகள் உண்டாகும்? Aflatoxin இருக்கும் உணவுப் பொருட்களை உட்கொள்வதால் உண்டாகும் நிலை  aflatoxicosis என்றழைக்கப்படும். இந்நிலையினால்  ஈரல் புற்று நோய், ஈரல் அழற்சி (cirrhosis and Reye’s syndrome), உணவுகள் சமிபாடு அடையாத்தனமை,  போன்றன ஏற்படும்.
  2. நாம் உண்ணும் உணவில் எந்த எந்த அளவில் aflatoxin இருக்கலாம்? பல்வேறு நாடுகளில் இதன் அளவானது 0-50mg/kg வரை வேறுபடுகின்றன. அமெரிக்காவில் 5mg/kg அளவினை விட அதிகரித்தல் ஆகாது . இலங்கையில் இது 15mg /kg ஆக இருக்கின்றது (Ref: Clarke’s Analytical Forensic Toxicology).
  3. இவ்வாறு இந்த பங்கசு  பாதித்த உணவுகளை அடையாளம் காணுவது? மிளகாயில் கறுப்பு நிறத்தில் இருக்கும் விதைகள் , கச்சானில் கறுப்பு அல்லது பழுப்பு நிறத்தில் இருக்கும் பருப்புகள், சோளத்தில் கறுப்பு நிறத்தில் இருக்கும் பகுதி, தேங்காய் கொப்பராவின் பழுதடைந்த  கறுப்பு நிறமாக பகுதி, வெங்காயம் மற்றும் உள்ளியில் கறுப்பு நிறத்தில் இருக்கும் பகுதி ஆகியன பங்கசினால் பாதிக்கபட்ட பகுதிகள் ஆகும் இவற்றினை மக்கள் உண்பதினை தவிர்ப்பது நல்லது.
    Maize cob colonized by Aspergillus species
  4. எவ்வாறு இந்த பங்கசு தொற்றினை தவிர்ப்பது?நாம் மேற்குறித்த உணவுகளை களஞ்சிய படுத்தும் பொழுது உலர்ந்த, இரலிப்பற்ற இடங்களில் களஞ்சிய படுத்த வேண்டும். இலங்கை மக்களுக்கு இது பற்றிய போதிய அறிவு இல்லை. எம்மில் எத்தனை பேர் சமைக்கும் பொழுது பங்கசு  தோற்றிய உணவு பகுதிகளை அகற்றி விட்டு சமைக்கின்றோம்  என்பது ஆண்டவனுக்கே வெளிச்சம்.

அதீத மது போதையும் தீடீர் மரணமும்

அண்மையில் இரவில் நடந்த மது விருந்துபசாரத்தில் கலந்து கொண்ட இளைஞர் ஒருவன் அடுத்த நாட்காலை தீடீரென்று மரணத்தினை தழுவிய செய்தி எல்லோருடைய மனதையும் ஒருகணம் பதற வைத்தது. பலருக்கு ஏன் இவ்வாறான தீடீர் மரணங்கள் நிகழுகின்றன என்பது பற்றி தெரியாது. இப்பதிவில் அதிகளவு மதுபான பாவனை எவ்வாறு தீடீர் மரணத்திற்கு காரணமாக அமைகின்றது என்பது பற்றி விளக்குகின்றேன்.

  1. நாம் மதுபானம் அருந்தும் பொழுது அது எமது இரத்தத்தில் எதைல் ஆல்கஹாலின் அளவு படிப்படியாக அதிகரித்து செல்லும். இவ்வாறு செல்லும் பொழுது ஒவ்வொரு செறிவிலும் அது குறித்த நடத்தை கோலங்களினை மது அருத்துபவரில் ஏற்படுத்தும். உதாரணமாக 50mg/dl என்ற அளவில் உள்ளபொழுது அது மது அருந்துபவரில் அதிகம் கதைக்கும் தன்மை, சுயநிலை மறந்த தன்மை போன்றவற்றை ஏற்படுத்தும். இவ்வாறே படிப்படியாக அதிகரித்து 250mg/dl என்ற அளவினை அடையும் பொழுது மயக்கம் மற்றும் கோமா நிலை போன்றவற்றினை ஏற்படுத்தும். 300mg/dl என்ற அளவினை தாண்டும் பொழுது அது ஆல்கஹால் நஞ்சு (Acute alcohol intoxication) ஆதலினை ஏற்படுத்தி இறப்பினை ஏற்படுத்தும்.
  2. மதுபானமானது எமது உடலில் பல்வேறுபட்ட மாற்றங்களினை உண்டாக்கும். அவற்றில் முக்கியமானது உணவு விழுங்கும் ஆற்றலினை பாதித்தல் ஆகும். இதன்காரணமாக அதிக மது அருந்திக்கொண்டு உணவு அருந்துபவர்களில் உண்ணும் உணவானது புரைக்கேற சாத்தியம் அதிகம் அல்லது வாந்தி எடுக்கும் உணவானது புரைக்கேற சாத்தியம் அதிகம். இவ்வாறு புரைக்கேறுவதினால் மது அருந்துபவர் திடீர் மரணம் அடைந்த சந்தர்ப்பங்கள் நிறைய உண்டு.
  3. அருந்தும் மதுவின் அளவினையும் அவர்கள் அதற்கு எடுக்கும் கால இடைவெளியினையும் வைத்து மது அருந்துபவர்களினை அவர்களினை பல்வேறு வகைகளாக பிரிக்கலாம். அவர்களின் ஒருவகையினர் தான் Binge drinker (heavy episodic drinker) இவர்கள் யார் என்றால் நாளாந்தம் மது அருந்தாமல் குறித்த சில நாட்களில் மிக அளவுக்கு அதிகமாக மது அருந்துபவர்கள். இவர்களை வரைவிலக்கணப்படுத்த பல்வேறு வரைவிலக்கணங்கள் மருத்துவரீதியில் உண்டு. இவர்கள் இவ்வாறு அளவுக்கு அதிகமாக மது அருந்தி சில மணித்தியாலங்களில் அவர்களின் இருதயத்துடிப்பு ஒழுங்கற்றதாக (sudden arrhythmic death syndrome (SADS)) மாறும் அதாவது சாதாரண மனிதன் ஒருவனுக்கு சராசரியாக நிமிடத்திற்கு 72 துடிப்புக்கள் என்று காணப்பட்ட இருதய துடிப்பு அதிகரித்து அதன் ரிதம் மாற்றமடையும் இதனால் மது அருந்தியவருக்கு மயக்கம், தலைச்சுற்று போன்றன ஏற்பட்டு திடீர் மரணம் ஏற்படலாம்.
  4. மேலும் அதீத போதையில் மது அருந்தியவர் தன்னிலை மறந்து நீண்டநேரம் மனித உடலின் நெஞ்சு மற்றும் தலைப்பகுதி கீழ் உள்ளவாறும் கால்ப்பகுதிமேலே உள்ளவாறும் தூங்குவார்கள் அதாவது கட்டில் அல்லது கதிரையில் இருந்து நெஞ்சு மற்றும் தலைப்பகுதி கீழே விழுந்த நிலையில், இவ்வாறு இவர்கள் ஏறத்தாழ தலைகீழாக அதிக நேரம் தூங்கும் பொழுது அவர்களின் வயிற்றில் உள்ள அங்கங்கள் நெஞ்சு பகுதியினை அமுக்குவதினால் மூச்சு விட சிரமப்பட்டு இறப்பார்கள். இவ்வாறான இறப்புக்கள் சட்ட மருத்துவத்தில் positional asphyxia deaths என்றழைக்கப்படும்.456
  5. அதீத மது போதையில் உள்ளவர்கள் வீதி விபத்துகளில் சிக்கியும், உயரமான கட்டிடங்களில் இருந்து தவறி வீழ்ந்தும், நீரில் மூழ்கியும் திடீர் மரணங்களை சந்தித்த சந்தர்ப்பங்கள் நிறைய உண்டு.
  6. மது அருந்த தொடங்கும் பொழுது நண்பர்களாக அருந்த தொடங்கியவர்கள், சிறிது நேரம் செல்ல போதையில் ஒருவரை ஒருவர் அடித்து கொலை செய்த சந்தர்ப்பங்களும் உண்டு.
  7. ஒருவர் நீண்ட காலமாக மதுப்பாவனைக்கு அடிமையாக இருக்கும் பொழுது அவர்களின் உடலில் பல்வேறுபட்ட நோய் நிலைகள் ஏற்படலாம். குறிப்பாக ஈரல் பழுதடைந்தல் (Cirrhosis), உணவு விழுங்கும் களத்தில் உள்ள இரத்த குழாய்களில் ஏற்படும் வரிக்கோசுநாளத்தில் ஏற்படும் வெடிப்பினால் ஏற்படும் குருதிப்பெருக்கு (esophageal varicieal bleeding), இதயத்தின் செயற்பாடு குறைதல்(cardiomyopathy) போன்றன ஏற்படலாம். மேற்குறித்த நோய் நிலைகள் திடீர் மரணங்களினை ஏற்படுத்தலாம்.
  8. பொதுவாக மதுப்பாவனைக்கு அடிமையாக இருப்பவர்கள் தற்கொலைக்கு முன்பாக அதிக மது அருந்திய நிலையிலேயே தற்கொலை செய்து கொள்வார்கள்.

இவ்வாறு அதீத மது போதை பல்வேறுபட்ட வழிகளில் திடீர் மரணங்களினை விளைவிக்கின்றது.

வெடித்து சிதறியது ஏன்?

அவள் அன்று அதிகாலையிலேயே எழுந்து சமைக்கத் தொடங்கிவிட்டாள். அவர்கள் வசிப்பது கொழும்பு மாநகரின் ஓர் சேரிப்புறம். அவளும் அவனும் காலை எழு மணிக்கு கொழும்பு மாநகர சபையின் வாகனத் தரிப்பிடம் ஒன்றிற்கு செல்ல வேண்டும். அங்கு தான் இருவருக்கும் மாலை வரை வேலை. வழமையாக இருவரும் சமைத்து பார்சல் செய்து எடுத்துச் செல்வார்கள். அவர்களது குடும்ப வறுமை காரணமாக அவர்கள் மண்ணெண்ணெய் குக்கர் ஒன்றினையே சமையலுக்கு பயன்படுத்தினார்கள் . அன்றும் சமையல் ஏறத்தாள முடிந்து விட்டது. கடைசி கறி அவிந்து கொண்டிருக்கும் பொழுது தான் அவள் அவதானித்தாள் குக்கர் வேலை செய்யவில்லை. அவள் குக்கரின் எண்ணெய் தாங்கியை திறந்து பார்த்தாள். அதில் மண்ணெண்ணெய் சிறிதளவு தான் இருந்தது. அவள் உடனடியாகவே அருகில் இருந்த கானில் இருந்த மண்ணெண்ணெய்யிணை எடுத்து குக்கரின் எரிபொருள் தாங்கியில் நிரப்பி விட்டு, எண்ணெய் தாங்கியின் முடியினை மூடி விட்டு திரும்பியதும் தான் தாமதம் பாரிய சத்தத்துடன் குக்கர் வெடித்து சிதறியது. அவள் பாரிய தீ்க்காயங்களுடன் உயிர் தப்பினாள்.
நாம் மேற்கூறியவாறன செய்திகளை பத்திரிகைகளிலும் இணையத்தளங்களிலும் நாளாந்தம் பார்க்கின்றோம். பலருக்கு மண்ணெண்ணெய் குக்கர் ஏன் வெடிக்கிறது என்று தெரியாது. அதனை விளக்கும் முகமாகவும் எதிர்காலத்தில் இவ்வாறன சம்பவங்களை குறைக்கும் வகையிலும் இப்பதிவினை இடுகின்றேன்.
சாதாரணமாக மண்ணெண்ணெய்யில் வேலை செய்யும் குக்கர்கள் இரண்டு வகையில் உள்ளது
1. அமுக்கத்தில் வேலை செய்யும் குக்கர் இதில் எரிபொருள் தாங்கியில் அமுக்கம் அதிகரிக்கப்பட்டு அதன் மூலம் மண்ணெண்ணெய் வளியுடன் கலந்து விசிறப்பட்டு எரிக்கப்படுவதன் காரணமாக வெப்பம் பிறப்பிக்கபடும். இவ்வகையான குக்கர் ஓரளவு பாதுகாப்பானது ஆனால் விலை கூடியது. மேலும் ஒப்பீட்டளவில் பராமரிப்பு செலவு கூடியது. இங்கு எரிபொருள் தாங்கியிலிருந்து மண்ணெண்ணெய் ஆனது குறிப்பிட்ட உயரம் வரை சென்று தான் எரிகின்றது இதன் காரணமாக வெப்பம் பெரிதளவில் எரிபொருள் தாங்கியினை அடைவதில்லை.

04

2. திரிகள் மூலம் வேலை செய்யும் குக்கர். இங்கு 25 தொடக்கம் 50 வரையான திரிகள் பயன்படுத்தப்படும். இது சாதாரண மண்ணெண்ணெய் கைவிளக்கு ஒன்று எவ்வாறு எரிகின்றதோ அவ்வாறே இந்த குக்கரும் வேலை செய்யும். வித்தியாசமான இங்கு பூரண தகனத்தினை உறுதி செய்யும் முகமாக burner பொருத்தபடிருக்கும். இவ்வகையான திரி குக்கர் அடுப்புகள் மிக மலிவானவை அத்துடன் ஆபத்து மிகுந்தவை.

03

இங்கு திரியாணது எரிபொருள் தாங்கியிள் இருந்து குறிப்பிட்ட அளவு உயரதிலேயே இருக்கும் ஏனென்றால் திரியானது மண்ணெண்ணெயிணை புவியீர்ப்பு விசைக்கு எதிராக குறிப்பிட்ட மிக குறைந்த உயரம் வரை தான் கொண்டுசெல்ல முடியும். இதன் காரணமாக எரிபொருள் தாங்கி நீண்ட நேர சமையலின் பொழுது வெப்பமடையும், மேலும் குக்கர் முழுவதும் உலோகத்தினால் செய்யப்பட்டு உள்ளதால் அவற்றின் மூலமும் வெப்பம் கடத்தப்பட்டு எரிபொருள் தாங்கியினை அடையும், மேலும் திரியானது தளர்வான நிலையில் பொருத்தப்பட்டிருந்தால் அது பொருத்தப்பட்டிருந்த ஓட்டையின் ஊடாக புகை மற்றும் வெப்பக் காற்று என்பன எரிபொருள் தாங்கியின் உட்புறத்தினை அடையும் இதன் காரணமாக தாமாகவே உட்புறம் உள்ள மண்ணெண்ணெய் தீப்பற்றி எரியக்கூடிய சாத்தியக் கூறுகள் உள்ளது. நீண்ட நேர சமையலின் பொழுது இடையில் மண்ணெண்ணெய் ஊற்றும் பொழுது இது மேலும் அதிகரிக்கும். மேலும் மண்ணெண்ணெய் பதிலாக பெட்ரோல் போன்ற எரிபற்று நிலை குறைந்த எரிபொருட்களை தவறுதலாக ஊற்றும் பொழுது சாத்தியககூறுகள் மேலும் அதிகமாக இருக்கும்.
இவ்வாறு எரிபொருள் தாங்கியின் உட்புறத்தில் தீ ஏற்படும் பொழுது அதிகளவு CO2, CO போன்ற வாயுக்கள் அதிகளவு உண்டாகும் மேலும் எரிபொருள் தாங்கியின் உட்புறத்தில் உள்ள வாயுக்கள் அதிகளவு விரிவடையும் அதன் காரணமாக அதிகளவு அமுக்கம் உட்புறத்தில் உருவாகும் இதன் காரணமாகக் குக்கர் அதாவது எரிபொருள் தாங்கி வெடித்து சிதறி பாரிய சேதத்தினை விளைவிக்கும்.
மேற்குறித்த சந்தர்ப்பம் தவிர கீழ்வரும் சந்தர்ப்பத்திலும் தீ விபத்து ஏற்பட சாத்தியக்கூறு உள்ளது. சிறிய மண்ணெண்ணெய் குக்கரில் ஒப்பீட்டளவில் பாரிய பாத்திரங்களை வைத்து அதிகளவு விசையுடன் சமையல் செய்யும் பொழுது குறிப்பாக அரிசி மா வறுத்தல் போன்றவற்றினை செய்யும் பொழுது குக்கர் தலைகீழாக விழுந்து சமையல் வேலை செய்பவரினை காயப்படுத்திய சந்தர்ப்பம் உண்டு.

மேலும் முக்கியமாக எம்மவர் குக்கர் வாங்கும் பொழுது அதனோடு சேர்ந்து வரும் அறிவுறுத்தல் பட்டியலை வாசிப்பதே இல்லை என்பதுவும் இவ்வகையான விபத்துக்களுக்கு ஓர் முக்கிய காரணம் ஆகும்.

தொட்டால் குற்றமா?

தற்கால இலத்திரனியல் மற்றும் அச்சு ஊடகங்கள் தூக்கில் தூங்கி யாராவது இறந்தால், கொலை செய்து தூக்கியதாகவே செய்திகள் வெளியிடுகின்றனர். அதுவும் கால்கள் நிலத்தை தொட்ட நிலையில் அவர் தூங்கிக் காணப்பட்டால் சொல்லி வேலையில்லை. இவ்வாறான சம்பவங்களில் பலரும் பலவாறாக தமது அபிப்பிராயங்களினை முன்வைப்பர். முக்கியமாக பலர் கூறுவது யாதெனில் கால்கள் தொட்ட நிலையில் தூக்கில் தொங்கி இறக்க முடியாது, யாராவது அடித்து கொலை செய்துவிட்டு இழுத்து வந்து தூக்கில் கொழுவியிருப்பார்கள் என்பதே.

சட்ட மருத்துவ ரீதியாக தூக்கில் தொங்கி இறத்தல் என்பது என்பது இறப்பவர் தனது முழு அல்லது பகுதி அளவிலான உடல் எடையினை விசையாக பயன்படுத்தி கழுத்தினை நெரித்து இறத்தல் ஆகும். பகுதி அளவிலான உடல் எடையினை பயன்படுத்தல் Partial hanging எனப்படும். இதன்பொழுது பொதுவாக கால் தரையினை தொட்ட வண்ணம் இருக்கும். தூக்கில் தொங்கி இறத்தல் சம்பவம் ஒன்றின் பொழுது மரணம் ஏற்பட்ட முறை மற்றும் சந்தர்பம் (cause and circumstance of death) ஏனைய காரணிகள் விலக்குவதால் அடையப்படும் (exclusion of other conditions). சிறைச்சாலைகள், போலீசின் தடுப்பு அறைகள் போன்றவற்றில் இருக்கும் தடுப்பு கைதிகள் கதவின் கைபிடியில் தூக்கு மாட்டி இறந்த சம்பவங்கள் நிறைய உண்டு.

பணமும் பிணமும்

கடந்த ஒரு சில நாட்களுக்கு முன்னர் வடமாகாணத்தின் பிரதேச வைத்தியசாலை ஒன்றில் பிணப் பரிசோதனை ஒன்றினை நடாத்துவதற்கு அவ்வைத்தியசாலையின் ஊழியர் ஒருவர் இறந்தவரின் உறவினரிடம் பணம் கேட்டமையினையும் அதனை இறந்தவர்களின் உறவினர்கள் கொடுக்க மறுத்ததினை தொடர்ந்து அவ்ஊழியர் விடுமுறையில் நின்றதினை தொடர்ந்து பிணப்பரிசோதனை ஒரு நாள் தள்ளி போனதோடு மட்டும் அல்லாது அவரது உடல் அழுகிய நிலையில் இரு நாட்களின் பின்னர் பிண பரிசோதனையின் பின்னர் உறவினரிடம் கையளிக்கப்பட்டது.
இப்பதிவின் மூலம் அரசாங்க வைத்தியசாலைகளில் நடைபெறும் மரணங்களும் அதனைத் தொடர்ந்து பிணப் பரிசோதனை நடைபெறும் பொழுது எவ்வாறு பொதுமக்களிடம் இருந்து அதாவது இறந்தவரின் உறவினரிடம் இருந்து எவ்வாறு பணம் மோசடியான முறையில் பெறப்படுகின்றது என்பதினை வெளிப்படுத்துவதே.
1. சில சந்தர்ப்பங்களில் இறந்தபின் உடனடியாக பிரேத பரிசோதனை செய்யப்படுவதில்லை. பொதுவாக அடுத்த நாளே செய்யப்படும். இவ்வாறான சந்த்ப்பங்களில் வைத்தியசாலை ஊழியர் இறந்த உடலினை குளிர்ப் பெட்டியில் வைத்து பாதுகாக்க பணம் கேட்பார்கள் கொடுக்கவிடில் உடலினை வெளியே வைப்பார்கள். அது தானாகவே அழுகிய நிலையில் பின்பு உறவினரிடம் ஓப்படைக்கப்படும் அல்லது எலி மற்றும் கரப்பான் போன்ற விலங்குகள் சேதப்படுத்திய நிலையில் ஒப்படைக்கப்படும்.

2. உடலினை வைத்திய சாலை விடுதியில் இருந்து பிரேத பரிசோதனை அறைக்கும் அதிலிருந்து வைத்திய சாலையின் வெளிப்புறம் கொண்டு வந்து தருவதற்கு பணம் கேட்பார்கள்.
3. சில வேளைகளில் விரைவாக பிரேத பரிசோதனையை முடித்து தர சட்ட வைத்திய அதிகாரி மற்றும் பொலிசாருக்கு பணம் தேவை என வைத்திய சாலை ஊழியர் பணம் பெற்ற சந்தர்ப்பம் உண்டு
4. மரண விசாரணையிணை மேற்கொள்ளும் பொலிஸார் தான் வேறு கடமையில் இருப்பதாகவும் அல்லது வேறு ஏதாவது காரணம் கூறி வர காலதாமதம் ஆகும் என்றும் விரைவாக முடிக்க வேண்டும் எனில் சப்பொட் பண்ணுமாறும் கேட்டதுண்டு.
5. மரண விசாரணைக்கு வந்த பொலிஸார் தான் சாப்பிடவில்லை எனக்கூறி உறவினர்களை அழைத்து சென்று விலை உயர்ந்த கடையில் கோழிப் பிரியாணி சாப்பிட்டதுடன் ஒரு சிகரெட் பாக்கெட்டை முழுமையாக வாங்கிய சம்பவமும் நடந்ததே.
6. சட்ட வைத்திய அதிகாரி போன்று பதில் கடமையாற்றும் சில வைத்தியர்கள் இறந்தவரின் உறவினரிடம் வைத்தியசாலை ஊழியர்கள் மூலம் கொத்து ரொட்டியும் மெகா சோடா போத்தல் ஒன்றும் வாங்கிய சம்பவமும் நடைபெற்றுள்ளது.
7. தீடீர் மரண விசாரணை அதிகாரி தனக்கு மரணம் நடந்த இடத்திற்கு வருகை தருவதற்கு பணம் வேண்டும், வாகன வசதி வேண்டும் என்று அடம் பிடித்த சம்பவங்கள் உண்டு. அவ்வாறு செய்ய மறுத்த நிலையில் வேண்டும் என்றே தாமதமாக வந்தமையும் போலீஸ் ரிபோட்க்கு என்று உறவினரிடம் காசு வேண்டியமையும் நடந்துள்ளது.
8. பெட்டிக்கடைகாரன் (சவப்பெட்டி ) வைத்தியசாலையில் அனுமதிக்கப்பட்டு மரணம் அடையும் தருவாயில் இருக்கும் உறவினரிடம் வந்து விசிட்டிங் காட் கொடுத்து தன்னிடம் வரும்படி கோரிக்கை விடுத்த சம்பவமும் நடந்துள்ளது.
9. விடுதி வைத்தியர் ஒருவர் சட்ட மருத்துவ ரீதியாக தீடீர் மரண விசாரணை செய்ய வேண்டிய அவசியம் இல்லாத மரணம் ஒன்றிற்கு உறவினரிடம் வேண்டும் என்றே மரண விசாரணையினை இல்லாமல் செய்ய காசு வேண்டும் என்று கேட்டமையும் நடந்துள்ளது.
10. பிரேத பரிசோதனை செய்த வைத்தியசாலை ஊழியர் பணம் கொடுக்க மறுத்த சந்தர்ப்பத்தில் உடலினை உரிய முறையில் தைக்காமல் கொடுத்த சந்தர்ப்பமும், அண்மையில் நடந்த குண்டு வெடிப்பில் இறந்தவரின் உடலில் இருந்து பெறுமதியான தங்க ஆபரணம் இணை கொள்ளை இட்ட சம்பவமும் நடந்துள்ளது.
இவற்றிற்கு என்னதான் தீர்வு? இலங்கையின் அரசவைத்திய சாலைகளில் நடைபெறும் தீடீர் மரணவிசாரணை மற்றும் அதனோடு இணைந்த உடற்கூராய்வு பரிசோதனை போன்றவற்றிக்கு எவ்விதமான கட்டணமும் செலுத்த தேவையில்லை என்பதே. பொதுமக்கள் இது தொடர்பாக விழிப்புணர்வு பெற வேண்டும்.