கடந்த சில மாதங்களுக்கு முன்னர் பிரசவத்தின் பொழுது கர்ப்பிணி தாயார் ஒருவர் திடீர் என மரணத்தினை தழுவி இருந்தார். இதன் காரணமாக பல சர்ச்சைகள் உருவாகி இருந்தன. இந்நிலையில் இவ்வாறான மரணங்களுக்கு காரணமான “நுரையீரலில்  இரத்தம் கட்டிபடல்” நோய் பற்றி இந்த பதிவு விரிவாக விளக்குகின்றது. இரத்தக்கட்டிஅடைப்பு (Thromboembolism) என்பது இரத்தக் குழாய்களின்  உட்புறத்தில் இரத்தம் ஜெல் போன்ற வடிவத்தில் உறைந்து, இரத்த ஓட்டத்தைத் தடுக்கும் ஒரு தீவிர மருத்துவ நிலையாகும். 

1. இரத்தக் கட்டி அடைப்பு எவ்வாறு உருவாகிறது?

• த்ரோம்போசிஸ் (Thrombosis): இரத்தக் குழாயின் உட்பகுதியிலேயே இரத்த உறைவு உருவாவதாகும்.
• எம்பாலிசம் (Embolism): ஓரிடத்தில் உருவான இரத்தக் கட்டி தளர்ந்து, இரத்த ஓட்டம் வழியாகப் பயணித்து உடலின் மற்றொரு பகுதியில் உள்ள குறுகிய இரத்த நாளத்தை அடைப்பதாகும்.

2. முக்கிய இடங்கள் மற்றும் பாதிப்புகள்

இரத்தக் கட்டி எங்கு அடைப்பை ஏற்படுத்துகிறது என்பதைப் பொறுத்து பாதிப்புகள் மாறுபடும்

• நுரையீரல் (Pulmonary Embolism): கால்களில் இருந்து நகரும் கட்டிகள் நுரையீரலில் அடைப்பை ஏற்படுத்தி மூச்சுத்திணறலை உண்டாக்கும்.
• மூளை (Stroke): மூளைக்குச் செல்லும் இரத்த ஓட்டம் தடைபடும் போது பக்கவாதம் ஏற்படுகிறது.
• இதயம் (Heart Attack): இதயத் தமனிகளில் அடைப்பு ஏற்படும் போது மாரடைப்பு உண்டாகிறது.
• கால்கள் (DVT): கால்களின் ஆழமான நரம்புகளில் ரத்தம் உறைவதால் வலி மற்றும் வீக்கம் ஏற்படுகிறது

3. கர்ப்பிணிகளில் இரத்த கட்டி உருவாக்குவதற்கான காரணங்கள்?

கர்ப்ப காலத்தில் ஒரு பெண்ணின் உடலில் ஏற்படும் உடலியல் மாற்றங்களே இரத்தக் கட்டி (Blood Clot) உருவாவதற்கான முக்கிய காரணங்களாகும். இது சாதாரண பெண்களை விட கர்ப்பிணிகளுக்கு 5 மடங்கு அதிக ஆபத்தை ஏற்படுத்துகிறது. இதற்கான முக்கிய காரணங்கள் கீழே விவரிக்கப்பட்டுள்ளன:

• இரத்தம் உறைதல் திறன் அதிகரிப்பு (Hypercoagulability): பிரசவத்தின் போது அதிக இரத்தப்போக்கு ஏற்படுவதைத் தடுக்க, இயற்கையாகவே கர்ப்பிணிகளின் உடலில் இரத்தத்தை உறைய வைக்கும் புரதங்கள் (Clotting factors) அதிகரிக்கின்றன. இது ஒரு பாதுகாப்பு ஏற்பாடு என்றாலும், தேவையற்ற நேரங்களில் இரத்த நாளங்களுக்குள் கட்டிகள் உருவாக இது வழிவகுக்கிறது.
• இரத்த ஓட்டம் மெதுவடைதல் (Venous Stasis): வளரும் கருப்பை (Uterus), இடுப்புப் பகுதியில் உள்ள இரத்த நாளங்களை அழுத்துவதால், கால்களில் இருந்து இதயத்திற்குச் செல்லும் இரத்த ஓட்டம் மெதுவாகிறது. இரத்தம் தேங்கி நிற்பதால் கட்டிகள் எளிதில் உருவாகின்றன.
• இரத்த நாளக் காயங்கள் (Endothelial Injury): பிரசவத்தின் போது (சாதாரணப் பிரசவம் அல்லது சிசேரியன்) இடுப்புப் பகுதி மற்றும் கருப்பைச் சுற்றியுள்ள இரத்த நாளங்களில் ஏற்படும் சிறிய காயங்கள் இரத்தக் கட்டிகள் உருவாகக் காரணமாகின்றன.
• அசையாமை (Immobility): நீண்ட கால படுக்கை ஓய்வு (Bed rest), அறுவை சிகிச்சைக்குப் பிறகு நடமாட்டம் குறைதல் அல்லது நீண்ட தூரப் பயணங்கள் இரத்த ஓட்டத்தைக் குறைத்து ஆபத்தை அதிகரிக்கின்றன.
• பிற காரணிகள்:
  • 35 வயதிற்கு மேற்பட்ட கர்ப்பம்.
  • அதிக உடல் எடை (Obesity).
  • மரபணு ரீதியான இரத்தம் உறைதல் குறைபாடுகள் (Thrombophilia).
  • இரட்டையர்கள் அல்லது அதற்கு மேற்பட்ட குழந்தைகள் சுமப்பது. 

இந்த காரணங்களால் கால்களில் உருவாகும் இரத்தக் கட்டிகள் (DVT), பிரிந்து நுரையீரலுக்குச் செல்லும்போது உயிருக்கு ஆபத்தான “நுரையீரல் இரத்தக்கட்டிஅடைப்பு ” ஏற்படுகிறது. 

4. முக்கிய அறிகுறிகள்:

இந்த நிலையின் அறிகுறிகள் அடைப்பின் அளவைப் பொறுத்து மாறுபடும்: 

• மூச்சுத் திணறல்: திடீரென ஏற்படும் மூச்சு விடுவதில் சிரமம்.
• மார்பு வலி: ஆழமாக மூச்சை உள்ளிழுக்கும்போது அல்லது இருமும்போது கூர்மையான வலி ஏற்படுதல்.
• இருமல்: சில நேரங்களில் இருமலில் இரத்தம் வெளிப்படுதல்.
• இதயத் துடிப்பு: இதயம் மிக வேகமாக அல்லது சீரற்றுத் துடித்தல்.
• மயக்கம்: திடீர் இரத்த அழுத்தக் குறைவால் தலைச்சுற்றல் அல்லது மயக்கம் ஏற்படுதல்.
• கால் வீக்கம்: பொதுவாக காலில் உள்ள நரம்புகளில் (DVT) உருவான இரத்தக் கட்டி நுரையீரலுக்குச் செல்வதால், காலில் வலி அல்லது வீக்கம் காணப்படலாம்.

5. சட்ட மருத்துவ முக்கியத்துவம் (Medico-legal Significance)

கர்ப்பிணி மரணங்களில் நுரையீரல் இரத்தக்கட்டிஅடைப்பு ஒரு முக்கிய காரணியாக இருப்பதால், இது பெரும்பாலும் சட்ட மருத்துவ உடற் கூராய்வு பரிசோதனைக்கு உட்படுத்தப்படுகிறது

• திடீர் மரணம்: ஆரோக்கியமாக இருந்த ஒரு கர்ப்பிணி அல்லது பிரசவித்த பெண் திடீரென மரணமடையும் போது, அது ‘இயற்கைக்கு மாறான மரணம்’ என சந்தேகிக்கப்பட்டு பிரேதப் பரிசோதனைக்கு (Autopsy) உத்தரவிடப்படலாம்.
• மரணத்திற்கான காரணத்தைக் கண்டறிதல்: மரணத்திற்கான காரணம் அம்னியோடிக் திரவ அடைப்பா (Amniotic Fluid Embolism) அல்லது இரத்தக் கட்டி அடைப்பா என்பதை உறுதி செய்ய முறையான திசுவியல் (Histopathology) ஆய்வுகள் அவசியம். 

6. நுரையீரல் இரத்தக் கட்டி அடைப்பு  ஏற்படும் எல்லா சந்தர்ப்பங்களிலும் சடுதியான மரணம் ஏற்படுமா?

நுரையீரல் இரத்தக் கட்டி அடைப்பு (Pulmonary Embolism) ஏற்படும் அனைத்து சந்தர்ப்பங்களிலும் சடுதியான மரணம் ஏற்படுவதில்லை. இருப்பினும், இது ஒரு மிக ஆபத்தான மருத்துவ நிலை என்பதால் உடனடி சிகிச்சை அவசியமாகும். இதன் பாதிப்பு மற்றும் உயிர் பிழைக்கும் வாய்ப்புகள் குறித்த முக்கியத் தகவல்கள்:

• சடுதியான மரணம்: நுரையீரல் இரத்தக் கட்டி அடைப்பு ஏற்பட்டவர்களில் சுமார் 25% பேருக்கு மட்டுமே முதல் அறிகுறியே சடுதியான மரணமாக இருக்கும்.
• சிகிச்சையின் முக்கியத்துவம்: சிகிச்சை அளிக்கப்படாத பட்சத்தில் உயிரிழப்பு விகிதம் 30% வரை உயர்கிறது. ஆனால், சரியான நேரத்தில் கண்டறியப்பட்டு சிகிச்சை அளிக்கப்பட்டால், இந்த ஆபத்து 2% முதல் 8% வரை பெருமளவு குறைகிறது.
• அடைப்பின் அளவு: இரத்தக் கட்டி மிகச் சிறியதாக இருந்தால், அது பெரிய பாதிப்பை ஏற்படுத்தாமல் மருந்துகள் மூலம் குணப்படுத்தப்படலாம். மாறாக, ‘ பாரிய நுரையீரல் இரத்தக் கட்டி அடைப்பு (Massive PE)’ எனப்படும் பெரிய அளவிலான அடைப்பு ஏற்படும்போது மட்டுமே இதயம் மற்றும் நுரையீரலின் செயல்பாடு திடீரென நின்று மரணம் நிகழ வாய்ப்புள்ளது.
• தடுக்கும் காலம்: பெரும்பாலான உயிரிழப்புகள் அறிகுறிகள் தோன்றிய முதல் சில மணிநேரங்களிலேயே நிகழ்கின்றன.

7. எவ்வாறு திடீர் மரணம் நிகழுகின்றது?

நுரையீரலுக்கு இரத்தத்தைக் கொண்டு செல்லும் முக்கிய தமனி (Main Pulmonary Artery) இரண்டாகப் பிரியும் இடத்தில் (Bifurcation), ஒரு பெரிய இரத்தக் கட்டி குறுக்காக மாட்டிக்கொள்வதையே ‘சேணத் த்ரோம்போ எம்பாலிசம்’ (Saddle thrombo embolism) என்கிறோம். இது ஒரே நேரத்தில் இரண்டு நுரையீரல்களுக்கும் செல்லும் இரத்த ஓட்டத்தைத் தற்காலிகமாகவோ அல்லது முழுமையாகவோ தடுக்கக்கூடும். இது ஒரு மருத்துவ அவசரநிலை (Medical Emergency). இது இதயத்தின் வலது பக்கம் அதிக அழுத்தத்தை (Right Heart Strain) ஏற்படுத்தி, திடீர் இதய செயலிழப்பு அல்லது உயிரிழப்பிற்கு வழிவகுக்கும். எவ்விதமான அறிகுறிகளும் இல்லாமல் சடுதியாக மரணம் நிகழும்.

8. எவ்வாறான சந்தர்ப்பங்களில் மருத்துவ கவனக்குறைவு (Medical Negligence) எனக்கொள்ளப்படலாம்?

சட்ட ரீதியாக, ஒரு நோயாளி அல்லது அவரது குடும்பத்தினர் பின்வரும் காரணங்களுக்காக மருத்துவர் அல்லது மருத்துவமனை மீது வழக்கு தொடர வாய்ப்புள்ளது:

• அறிகுறிகளை அலட்சியப்படுத்துதல்: மூச்சுத் திணறல் அல்லது மார்பு வலி போன்ற இரத்தக் கட்டி அடைப்பு க்கான அறிகுறிகளை ‘சாதாரண கர்ப்பகால அசதி’ என்று தவறாகக் கருதி பரிசோதிக்கத் தவறுதல்.
• தடுப்பு மருந்து வழங்காமை: அதிக ஆபத்துள்ள நிலையில் உள்ள கர்ப்பிணிகளுக்கு (எ.கா: உடல் பருமன், முந்தைய ரத்த உறைவு பாதிப்பு) இரத்தம் கட்டிபடுதலை தடுக்கும் மருந்துகளை (Prophylaxis) வழங்கத் தவறுதல்.
• தவறான நோயறிதல்: தகுந்த பரிசோதனைகளை (CTPA அல்லது V/Q scan) மேற்கொள்ளாமல் நோயைக் கண்டறியத் தாமதிப்பது ‘சிகிச்சை தரக் குறைபாடு’ (Standard of Care breach) எனக் கருதப்படலாம். 
• மருத்துவக் கவனக்குறைவு நிரூபிக்கப்பட்டால், பாதிக்கப்பட்ட பெண்ணுக்கோ அல்லது அவரது குடும்பத்திற்கோ நஷ்டஈடு வழங்க நீதிமன்றம் உத்தரவிடலாம்.

9. இந்த நோய் நிலைமையினை முற்கூட்டி அறிந்து தடுக்கும் வசதி உண்டா?

ஆசிய நாட்டு பெண்களிடம் இந்த நோய் மிக அரிதாகவே இருக்கும் எனினும் கர்ப்பகால முதல் கிளினிக் வருகையின் பொழுது வைத்தியர்கள் குறித்த பெண்ணிற்கு கர்ப்ப காலத்தில் அல்லது பிரசவத்தின் பொழுது அல்லது பிரசவத்தின் பின்னர் நுரையீரல் இரத்தம் கட்டி படும் சாத்தியம் உண்டா என ஆராய்வார்கள். இவ்வாறு இருக்கும் நிலையில் உரிய தடுப்பு மருந்துகளை வழங்குவார்கள். எனினும் சில பெண்களிடம் பிறப்பில் இருந்தே சில குறைபாடுகள் (Antithrombin III, Protein C , Protein S பற்றாக்குறை …) காரணமாக இந்த நுரையீரல் இரத்தம் கட்டி படும் நோய் உருவாகும். வழமையாக இவ்வாறன குறைபாடுகளை ஆராய்ந்து பரிசோதிப்பது நடைமுறையில் இல்லை.

நன்றி